जेनजी आन्दोलनका सहिद परिवार र घाइतेलाई उद्यम गर्न ५० लाखसम्म सहुलियत कर्जा

 काठमाडौं ।सरकारले जेनजी आन्दोलनका सहिद परिवार र घाइतेलाई स्वरोजगार तथा उद्यम सञ्चालनमा प्रोत्साहन गर्ने उद्देश्यले ५० लाख रुपैयाँसम्म सहुलियतपूर्ण कर्जा उपलब्ध गराउने भएको छ।

अर्थ मन्त्रालयले शुक्रबार जारी गरेको ‘सहुलियतपूर्ण कर्जाका लागि ब्याज अनुदानसम्बन्धी (दोस्रो संशोधन) कार्यविधि, २०८३’ मार्फत सहिद परिवार तथा घाइतेलाई लक्षित नयाँ कर्जा व्यवस्था थप गरेको हो।

संशोधित कार्यविधिअनुसार नेपाल सरकार वा प्रचलित कानुनबमोजिम अधिकारप्राप्त निकायबाट जेनजी आन्दोलनका सहिद परिवार वा घाइतेका रूपमा प्रमाणित व्यक्तिले यस्तो कर्जा लिन सक्नेछन्।

कार्यविधिले ‘सहिद परिवार’ अन्तर्गत आन्दोलनमा ज्यान गुमाएका व्यक्तिका पति, पत्नी, छोरा, छोरी, बाबु वा आमालाई समेटेको छ।

उपलब्ध हुने सहुलियतपूर्ण कर्जा कृषि तथा पशुपन्छी व्यवसाय, घरेलु तथा साना उद्योग, सेवा व्यवसाय, सूचना प्रविधिमा आधारित उद्यम, पर्यटन, उत्पादनमूलक उद्योग तथा स्टार्टअप सञ्चालनमा प्रयोग गर्न सकिनेछ। सरकारले तोकेका अन्य उत्पादन तथा रोजगारी सिर्जना गर्ने व्यवसायमा समेत कर्जा उपलब्ध गराउन सकिने व्यवस्था गरिएको छ।

सरकारले यो व्यवस्थामार्फत आन्दोलनबाट प्रभावित परिवार तथा घाइतेलाई राहतसँगै स्वरोजगार, उद्यमशीलता र आयआर्जनका अवसरमा जोडेर दीर्घकालीन रूपमा आर्थिक रूपमा सबल बनाउने नीति अघि सारेको छ।