कुलमान पुगे सर्वोच्चमा, कस्तो होला आदेश ?
टुरिजमफेस
काठमाडौं । सरकारको बर्खास्तीमा परेका नेपाल विद्युत प्राधिकरणका कार्यकारी निर्देशक कुलमान घिसिङले सरकारको निर्णयविरुद्ध सर्वोच्च अदालतमा रिट दायर गरेका छन् । उनले अधिवक्ता लोकमणि पोखरेललाई वारेस राखेर रिट दायर गरेकोसर्वोच्च अदालतका प्रवक्ता अच्युत कुइँकेलले जानकारी दिए ।
घिसिङले प्रधानमन्त्री तथा मन्त्रिपरिषद्को कार्यालय, ऊर्जा मन्त्रालयलगायतलाई विपक्षी बनाएका छन् । आफूलाई बर्खास्त गर्ने सरकारको निर्णय बदर गरी तत्काल काम कारबाही गर्न दिनू भनी अन्तरिम आदेशसमेत उनले माग गरेका छन् । मन्त्रिपरिषद् बैठकले कार्यकाल सकिन चार महिना बाँकी रहेका घिसिङलाई पदमुक्त गरी हिदेन्द्रदेव शाक्यलाई प्राधिकरणको कार्यकारी निर्देशकमा नियुक्त गरेको थियो । घिसिङ हटाउने सरकारको निर्णयको चौतर्फी विरोध भइरहेको छ । उनी पुनः पदमा फर्कने वा नफर्कने भन्नेबारे अदालतले गर्ने आदेशमा भर पर्नेछ ।
