पर्यटकीय सिजनमै जोमसोममा बजार अनुगमन, होटल–पसलको सेवा र खाद्य सुरक्षामाथि प्रशासनको कडाइ

मुस्ताङ । पर्यटकको चहलपहल बढिरहेको मुस्ताङको प्रमुख पर्यटकीय केन्द्र जोमसोममा स्थानीय प्रशासन र गाउँपालिकाले होटल, किराना तथा खाद्यान्न पसलहरूमा आकस्मिक बजार अनुगमन थालेका छन्। पर्यटन याममा सेवाको गुणस्तर, खाद्य सुरक्षाको अवस्था र व्यवसायिक अनुशासन कायम राख्ने उद्देश्यले घरपझोङ गाउँपालिकाको नेतृत्वमा संयुक्त अनुगमन टोलीले पुथाङ एयरपोर्ट बजार क्षेत्रमा छड्के जाँच गरेको हो।

गाउँपालिका उपाध्यक्ष जमुना थकालीको नेतृत्वमा गरिएको अनुगमनमा जिल्ला प्रशासन कार्यालय, जिल्ला प्रहरी कार्यालयलगायत सरोकारवाला निकाय सहभागी थिए। टोलीले घरपझोङ–३, जोमसोमस्थित पुथाङ एयरपोर्ट बजार आसपासका २५ भन्दा बढी होटल, किराना, फ्रेस हाउस तथा खाद्यान्न पसलको निरीक्षण गरेको गाउँ कार्यपालिका सदस्य भिषण थकालीले जानकारी दिए।

जोमसोम मुस्ताङको सदरमुकाम मात्र नभई मुक्तिनाथ, कागबेनी, लोमान्थाङ लगायतका गन्तव्यतर्फ जाने पर्यटकहरूको मुख्य प्रवेश–केन्द्र पनि भएकाले यहाँको बजार व्यवस्थापनलाई विशेष महत्वका साथ हेरिएको हो। स्थानीय तहका अनुसार, यतिबेला धार्मिक तथा मनोरञ्जनात्मक दुवै प्रकारका पर्यटकको आगमन बढेकाले उनीहरूको स्वास्थ्य, सुरक्षासहित सेवा–सुविधाको स्तर सुनिश्चित गर्न अनुगमनलाई तीव्रता दिइएको हो।

अनुगमनका क्रममा टोलीले व्यवसायीहरूले व्यवसाय दर्ता तथा नवीकरण, मूल्यसूची, साइनबोर्ड, लगबुक रजिस्टर, खरिद बिल तथा उपभोक्तालाई दिइने बिल, प्यान/भ्याट प्रयोग, सरसफाइ, मदिरासम्बन्धी कर तथा दर्ता कागजात, खाद्य सामग्रीको लेबल, म्याद, नापतौल, तथा अन्तःशुल्क स्टिकरको अवस्थाबारे विस्तृत जाँच गरेको थियो।

त्यसक्रममा म्याद नाघेका तथा उपभोगका लागि अयोग्य खाद्य सामग्री बरामद गरिएको र ती वस्तुहरू सम्बन्धित निकायको रोहबरमा कालीगण्डकी नदी किनारमा खाल्डो खनी नष्ट गरिएको जनाइएको छ।

सिसाका बोतलमा बिक्री हुने बियरमाथि अझ कडाइ

घरपझोङ गाउँपालिकाले २०८० सालदेखि गाउँपालिकाभित्र सिसाका बोतलमा ‘ब्रान्डिङ’ गरिएका बियरको बिक्री–वितरणमा प्रतिबन्ध लगाउँदै आएको छ। गाउँपालिकाका अनुसार, सिसाका बोतलले दुर्घटना, फोहोर व्यवस्थापनको समस्या र वातावरणीय जोखिम बढाउने भएकाले उक्त निर्णय गरिएको हो। यसपटकको बजार अनुगमनले सो नियमको कार्यान्वयन अवस्था पनि जाँच गरेको छ।

स्थानीय सरकारका प्रतिनिधिहरूका अनुसार, पर्यटकको संख्या बढ्दै जाँदा होटल, रेष्टुराँ र पसलहरूले स्वच्छता, पारदर्शी मूल्य, सुरक्षित खाद्य सामग्री र कानुनी प्रक्रिया पालना गर्नु अत्यावश्यक हुन्छ। मुस्ताङजस्तो संवेदनशील हिमाली गन्तव्यमा बजार व्यवस्थापन राम्रो हुन सके यसले पर्यटकको अनुभव सकारात्मक बनाउने र गन्तव्यको छवि बलियो बनाउने विश्वास स्थानीय तहको छ।

पर्यटनसँग जोडिएको बजार अनुशासन

जोमसोम र वरपरका क्षेत्रमा पछिल्ला वर्षहरूमा आन्तरिक तथा भारतीय पर्यटकको आगमन उल्लेख्य रूपमा बढ्दै गएको छ। त्यसैले अब केवल पर्यटक भित्र्याउने मात्र होइन, उनीहरूले पाउने सेवा, खाद्य सुरक्षाको स्तर, मूल्यको पारदर्शिता र वातावरणीय जिम्मेवारी पनि उत्तिकै महत्वपूर्ण बन्दै गएको छ। यही सन्दर्भमा जोमसोममा गरिएको यो छड्के अनुगमनलाई पर्यटन व्यवस्थापन र उपभोक्ता सुरक्षालाई एकसाथ सुदृढ पार्ने प्रयासका रूपमा हेरिएको छ।