साउनदेखि नागढुंगा सुरुङमार्ग सञ्चालनको तयारी, यस्ता छन् टोल शुल्क र फाइदा

आयोजना निर्देशक सौजन्य नेपालका अनुसार सुरुङको मुख्य निर्माण कार्य सम्पन्न भइसकेको छ। अहिले आपत्कालीन उद्धार प्रणाली, सुरक्षा संयन्त्र, अग्नि नियन्त्रण, सञ्चार तथा सञ्चालन व्यवस्थापनका काम तीव्र रूपमा भइरहेका छन्। सुरुङको पश्चिमतर्फ पहिरो नियन्त्रणका केही संरचनागत काम बाँकी रहे पनि त्यसले सञ्चालनमा असर नपर्ने उनको भनाइ छ। यद्यपि उद्घाटनको निश्चित मिति भने अझै तय भएको छैन।

सरकारलाई हस्तान्तरणपछि निजी कम्पनीले सञ्चालन गर्ने

निर्माण सम्पन्न भएपछि जापानी कम्पनी हाज्मा–आन्दो कर्पोरेसनले आयोजना नेपाल सरकारलाई हस्तान्तरण गर्नेछ। त्यसपछि चिनियाँ साझेदारी कम्पनी युक्सिन–एआरटी जेभीले सञ्चालन तथा व्यवस्थापनको जिम्मेवारी सम्हाल्नेछ।

सुरुङ प्रयोग गर्ने सबै सवारीसाधनले सेवा शुल्क (टोल) तिर्नुपर्नेछ।

सवारीअनुसार निर्धारण गरिएको टोल

• कार, भ्यान, पिकअप, ट्र्याक्टर, माइक्रोबस तथा हलुका सवारी
  • काठमाडौं प्रवेश: रु. ६५
  • बाहिरिने: रु. ६०
• मिनीबस तथा मिनी ट्रक/टिपर
  • प्रवेश: रु. ११५
  • बाहिरिने: रु. ८०
• बस तथा सिंगल रियर एक्सल ट्रक
  • प्रवेश: रु. २६०
  • बाहिरिने: रु. २००
• मल्टी एक्सल ट्रक तथा भारी उपकरण
  • प्रवेश: रु. ६००
  • बाहिरिने: रु. २५०

जाम घटाउने र समय बचाउने अपेक्षा

सुरुङमार्गले काठमाडौंको बलम्बु र धादिङको सिस्नेखोलालाई जोड्नेछ। हाल करिब ८ किलोमिटरको दूरी सुरुङमार्ग सञ्चालनपछि करिब ५ किलोमिटरमा सीमित हुनेछ।

दूरी धेरै नघटे पनि सिस्नेखोला–नागढुंगा क्षेत्रमा दैनिक हुने ट्राफिक जामबाट मुक्ति मिल्ने अपेक्षा गरिएको छ। सुरुङ प्रयोग गर्दा काठमाडौं प्रवेश गर्ने सवारीले करिब ३३ मिनेट र बाहिरिने सवारीले २३ मिनेटसम्म समय बचाउने अनुमान गरिएको छ। यसले इन्धन खपत घटाउनुका साथै यात्रालाई सहज बनाउने विश्वास छ।

सुरक्षालाई प्राथमिकता

आयोजनामा दुईवटा सुरुङ निर्माण गरिएको छ। एउटा मुख्य सुरुङ र अर्को आपत्कालीन उद्धारका लागि छुट्टै रेस्क्यु सुरुङ हो। मुख्य सुरुङसँग समानान्तर रहेको उद्धार सुरुङ करिब २,५५७ मिटर लामो छ।

दुवै सुरुङलाई जोड्ने सात वटा क्रस–प्यासेज निर्माण गरिएका छन्, जसबाट दुर्घटना वा आगलागी जस्ता आकस्मिक अवस्थामा एम्बुलेन्स, दमकल र उद्धार टोलीले तत्काल आवतजावत गर्न सक्नेछन्। सुरुङभित्र आधुनिक भेन्टिलेसन, जेट फ्यान तथा अग्नि सुरक्षा प्रणाली पनि जडान गरिएको छ।

२२ अर्बभन्दा बढीको लगानी

नागढुंगा सुरुङमार्ग आयोजनामा कुल २२ अर्ब रुपैयाँभन्दा बढी लगानी भएको छ। परियोजनाका लागि जापान अन्तर्राष्ट्रिय सहयोग नियोग (JICA) ले सहुलियत ऋण उपलब्ध गराएको छ। हालै थप करिब ५ अर्ब ४७ करोड रुपैयाँ बराबरको सहुलियत ऋण सम्झौता पनि भइसकेको छ।

नेपाल र जापानबीच सन् २०१६ मा भएको ऋण सम्झौताअनुसार १० वर्षसम्म ब्याज मिनाहा रहने र त्यसपछि ४० वर्षभित्र ऋण चुक्ता गर्ने व्यवस्था गरिएको छ। आयोजना लागतमा नेपाल सरकारको पनि उल्लेखनीय लगानी रहेको छ।