काठमाडौं ।   देशमा पश्चिमी न्यून चापीय प्रणाली र मनसुनी वायुको प्रभाव कायम रहँदा विभिन्न क्षेत्रमा वर्षा भइरहेको छ। जल तथा मौसम विज्ञान विभागको मौसम पूर्वानुमान महाशाखाका अनुसार शनिबार कोशी, मधेस र बागमती प्रदेशका विभिन्न स्थानमा वर्षा भएको छ।

महाशाखाका अनुसार पछिल्लो १२ घण्टामा कोशीदेखि लुम्बिनी प्रदेशसम्मका विभिन्न स्थानमा हल्कादेखि मध्यम वर्षा भएको छ। केही स्थानमा भने भारी वर्षासमेत मापन गरिएको छ।

वर्षाको विवरणअनुसार सर्लाहीको नवलपुरमा ६३ मिलिमिटर र मनुस्मारामा ५६ मिलिमिटर पानी परेको छ। त्यसैगरी काभ्रेको रोशीमा ५०.८ मिलिमिटर, नुवाकोटको ककनीमा ४९ मिलिमिटर, ललितपुरको गोदावरीमा ४६.८ मिलिमिटर, सिन्धुपाल्चोकको बाउनेपाटीमा ४१.६ मिलिमिटर, संखुवासभाको चैनपुरमा ३९ मिलिमिटर र काठमाडौंको पानीपोखरीमा ३० मिलिमिटर वर्षा मापन भएको छ।

आज कहाँ-कहाँ पानी पर्न सक्छ?

महाशाखाको पूर्वानुमानअनुसार शनिबार दिउँसो कोशी प्रदेशका सबै भूभागमा तथा देशका हिमाली र पहाडी क्षेत्रमा सामान्यतया बादल लाग्नेछ। तराईका क्षेत्रमा भने आंशिक बदली रहने सम्भावना छ।

दिउँसो कोशी, बागमती र गण्डकी प्रदेशका हिमाली तथा पहाडी भूभागका थोरै स्थानमा मेघगर्जन र चट्याङसहित मध्यम वर्षा हुन सक्ने अनुमान गरिएको छ। त्यस्तै लुम्बिनी, कर्णाली र सुदूरपश्चिम प्रदेशका हिमाली तथा पहाडी क्षेत्रका एक-दुई स्थानमा पनि वर्षाको सम्भावना छ।

कोशी प्रदेशको तराई क्षेत्रमा समेत एक-दुई स्थानमा मेघगर्जन र चट्याङसहित मध्यम वर्षा हुन सक्ने महाशाखाले जनाएको छ।

रातिको मौसम कस्तो रहला?

शनिबार राति देशका हिमाली तथा पहाडी क्षेत्रमा आंशिक बदली रहने र तराईका अधिकांश स्थानमा मौसम मुख्यतया सफा रहने पूर्वानुमान छ।

रातिको समयमा कोशी, बागमती र गण्डकी प्रदेशका हिमाली तथा पहाडी भूभागका एक-दुई स्थानमा हल्का वर्षा र हिमपात हुन सक्ने सम्भावना रहेको महाशाखाले जनाएको छ।